რატომ "იხურებიან" სტარტაპ-პროექტები?

რა უნდა მოვიმოქმედოთ იმისათვის, რომ ჩვენი რეკლამა იყოს ეფექტიანი?

მარკეტინგული კომუნიკაციების ექსპერტი - ვახტანგ ხომიზურაშვილი

 თქვენ ხედავთ, რამდენად რთული ხდება მომხმარებელთა დარწმუნება. ატყობთ, რომ რეკლამა ხდება სულ უფრო და უფრო ნაკლებად ეფექტიანი და გსურთ მდგომარეობის გამოსწორება - მაშინ ეს მინი-წიგნი არის თქვენთვის!

 რა უნდა მოვიმოქმედოთ იმისათვის, რომ ჩვენმა რეკლამამ იმუშაოს?

რატომ ვხარჯავთ ტყუილად ჩვენს ფულს უმისამართო რეკლამაში?

სარეკლამო ბიზნესის ერთ-ერთმა პირველმა ფუძემდებელმა ჯონ უონამეიერმა თქვა: „ჩემი სარეკლამო გზავნილების ნახევარი - არავის არ ჭირდება! უბრალოდ, მე არ ვიცი ეს რომელი ნახევარია.“

მსოფლიოში ყოველწლიურად სარეკლამო ხარჯები აღწევს 332 მილიარდ დოლარს და დადგენილია, რომ აქედან 50% იხარჯება არაეფექტიანად!

რამდენიმე მოსაზრება მარკეტინგის შესახებ:

საერთოდ, მსოფლიოში, მარკეტინგული აქტივობის ტენდენციების გათვალისწინებით, სულ უფრო მკაფიო ხდება ე.წ. „კლასიკური მარკეტინგის“ მეთოდების არაეფექტიანობა!

ამის ძირითადი მიზეზია  „კლასიკური მარკეტინგის“ ისეთი ინსტრუმენტები, როგორიცაა:

§  სხვადასხვა სახის საბონუსო და ფასდაკლების აქციები;

§  ძვირადღირებული სატელევიზიო კლიპები;

§  სხვადასხვა სახის სარეკლამო მოწოდებები, მათ შორის, გარე-რეკლამა.

რა შეიძლება იყოს ამის მიზეზი?

პირველ რიგში, ის, რომ კომპანიებს არა აქვთ ზუსტად გამოკვეთილი  მიზნობრივი სამომხმარებლო აუდიტორია. ისინი არ იცნობენ საკუთარ მომხმარებელს და ისევ და ისევ (უკვე რამდენი ხნის განმავლობაში) უშვებენ ერთსა და იმავე შეცდომას - ცდილობენ მიაწოდონ სარეკლამო ინფორმაცია ყველა ტიპის მომხმარებელთა კატეგორიას ერთად.

უკვე დიდი ხანია, რაც ცნობილია, რომ „მარკეტინგი ყველასათვის“ - არაეფექტიანია და მის ნაცვლად სწრაფად მკვიდრდება მარკეტინგის ალტერნატიული მიმართულება - „რადიკალური მარკეტინგი“, რომელიც ორიენტირებულია უშუალოდ მომხმარებლის „ფარული მოთხოვნილების“ სიღრმისეულ შესწავლასა და მათ დაკმაყოფილებაზე.

რაც შეეხება მომხმარებელთა მოთხოვნილების მარკეტინგული კვლევების  ჩატარებას - აქ საერთოდ სავალალოდ არის საქმე. პირველ რიგში, უმეტესი კომპანიის მარკეტინგულ სამსახურებს არც კი გააჩნიათ საკმარისი ოდენობის ბიუჯეტები შესაბამისი კვლევების ჩასატარებლად და ამასთან,  ჯეროვნად არ აფასებენ ამ კვლევების მნიშვნელობას.

მარკეტინგული გამოკვლევების პრობლემა (თუ საერთოდ ტარდება ასეთი გამოკვლევები) მდგომარეობს იმაში, რომ მარკეტოლოგები ძირითადად ხელმძღვანელობენ „გასაშუალებული მონაცემებით“. ისინი იღებენ ინფორმაციას იმის შესახებ - რა მოთხოვნილებები აქვს „საშუალო მომხმარებელს“.

 მაგრამ ბუნებაში „საშუალო მომხმარებელი“ არ არსებობს!

როგორც ნათქვამია ერთ ინგლისურ გამოთქმაში: „ზოგს უყვარს ცხელი ჩაი, ზოგს მოწონს ცივი ჩაი ყინულით, მაგრამ ცოტა ვინმეს თუ მოეწონება ნელ-თბილი ჩაი...“

„კლასიკური მარკეტინგის“ მიმდევრები გამოსავალს პოულობენ ე.წ. „ფოკუს ჯგუფების“ გამოკითხვებში (იმიტომ, რომ ეს არის ყველაზე იაფი და სწრაფი გამოკითხვის საშუალება).

მარკეტინგული კვლევების ჯგუფის “Providian Financial” - ის ხელმძღვანელი შაილეშ მეტა ამბობს:  - „ფოკუს ჯგუფის შემადგენლობაში შემავალი ადამიანები ამბობენ ერთს და რეალურ ცხოვრებაში, Shopping-ის დროს, იქცევიან კარდინალურად განსხვავებულად.“

 ეს ხდება იმიტომ, რომ ფოკუს ჯგუფებში ადამიანებს სურთ, რომ გამოიყურებოდნენ სხვების თვალში კომპეტენტურად,  დაახლოებით ისე, როგორც წარმოდგენილები არიან  ადამიანები, მაგალითად, “Facebook”-ში. ისინი ცდილობენ შექმნან საკუთარი „სახე“ და გამოიყურებოდნენ სხვების თვალში ისე, როგორც არის მიღებული და არა ისე - რასაც წარმოადგენენ ისინი რეალურ ცხოვრებაში („სნობიზმის მახე“).

“ფოკუს ჯგუფების მსხვერპლის“ კარგი მაგალითია “Coca-Cola”, რომელმაც მიიღო უზარმაზარი ზარალი ახალი პროდუქტის “New Coce”- ს ბაზარზე „გაყვანის“ შედეგად!

 ამ შემთხვევაში „ფოკუს ჯგუფების“ მიერ, ახალი პროდუქტის დეგუსტაციისას, მონაწილეები ირწმუნებოდნენ, რომ მათ მოწონთ ახალი „Coca” და ისინი სიამოვნებით შეიძენენ მას... რეალობაში მომხმარებელი არ ყიდულობდა ამ პროდუქტს და კომპანია იძულებული გახდა შეეწყვიტა ამ პროდუქტის წარმოება და დაეფარა მილიონობით ზარალი.

ეს კიდევ ერთხელ აჩვენებს, თუ რამდენად მნიშვნელოვანია საკუთარი მომხმარებლის მიდრეკილებების და ხასიათის ცოდნა!

„რადიკალური მარკეტინგის“ მესვეურები მიმართავენ განსხვავებულ სტრატეგიას. ისინი, პირველ რიგში, ორიენტირებული არიან თავიანთი მიზნობრივი ჯგუფების წარმომადგენლების ფსიქოლოგიის შესწავლაზე.

ტყუილად არ არის ნათქვამი, რომ: „შენ ვერ გაუგებ ბოლომდე ადამიანს, თუ არ გაივლი რამდენიმე კილომეტრს მისი ფეხსაცმლით“. მაგალითად, ერთი კომპანია, იმისათვის, რომ ბოლომდე შეიცნოს თავისი პროდუქციის მომხმარებლის დამოკიდებულება, მიდრეკილებები, პრიორიტეტები, სურვილები, შფოთვის მიზეზები, განცდები და ა.შ. - ავალებს თავის თანამშრომლებს - რიგრიგობით იმუშაონ ტაქსზე (წარმოჩნდნენ ტაქსისტების როლში), მხოლოდ ერთი მიზეზით - უკეთესად შეიცნონ საკუთარი მომხმარებელი.

საინტერესო მარკეტინგული სტრატეგია აქვს ყველასათვის ცნობილ „Harley Davidson”- ის კომპანიას. არ არის საიდუმლო, რომ ე.წ.“Harley”-ს პროდუქცია (მოტოციკლეტები) ითვლებოდა ყოველთვის, როგორც განსხვავებული იდეოლოგიის სიმბოლო, რომელსაც განასახიერებენ  “Harley”-ს მფლობელები. 50-იან წლებში “Harley”-ს მოტოციკლეტების მფლობელები ძირითადად იყვნენ შინაგანი პროტესტით აღსავსე პირები, გარკვეულ წილად ე.წ. „სოციალური რევოლუციონერები“, რომლებსაც ხშირად უწოდებდნენ „ჯოჯოხეთის ანგელოზებს“.

სინამდვილეში ეს ადამიანები, მიუხედავად მათი „დამაშინებელი“ ატრიბუტიკის, იყვნენ პატიოსანი და კანონმორჩილი მშრომელები, რომლებიც უბრალოდ აქტიურად ატარებდნენ თავისუფალ დროს და რომლებისთვისაც ეს „Harley Davidson”-ის „საძმო“ იყო, როგორც გარკვეული თავშესაფარი, დღევანდელი ცხოვრების სულ უფრო და უფრო მზარდი სოციალური ნეგატივისაგან. ეს იყო “Harley”-ს მოყვარულ-ფანატიკოსთა ერთობლიობა.

მაშინ „Harley Davidson”-ის გენერალურმა მენეჯერმა კლაიდ ფესლერმა, უამრავ ადამიანთან უშუალო კონტაქტის წყალობით აღმოაჩინა, რომ აქამდე ცნობილი “Harley”-ს ტრადიციული მფლობელების გარდა, ამ მოტოციკლეტების მფლობელები (და დიდი მოყვარულები) არიან ის ადამიანები, რომლებიც დღისით სხედან “Wall-Street”-ის  ოფისებში და იკავებენ მაღალი რანგის თანამდებობებს,   საღამოს კი ცვლიან “Versache”-ს კოსტუმებს  ტყავის შარვლებზე, ტყავის ქურტუკებსა და უხეშ „ჯარისკაცების ფეხსაცმელებზე“, სხდებიან თავიანთ  „Harley Davidson”- ზე და იწყებენ ცხოვრებას „სხვა სამყაროში“...

 კ.ფესლერმა შეცვალა თავისი კომპანიის მარკეტინგული სტრატეგია და შედეგი ყველამ დაინახა - Hollywood - ის თითქმის ყოველი მესამე ცნობილი მსახიობი მამაკაცი თავის საყვარელ „Harley Davidson”-ზე .

როგორც თქვენ თვითონ ხვდებით, - ამაზე კარგი რეკლამა მსოფლიოში ჯერ არ მოუგონიათ. “Harley” გადაიქცა თავისუფლების, დაუმორჩილებლობის, ინდივიდუალიზმის გამოხატვის სიმბოლოდ, რომელმაც ლამის შეცვალა „დასავლეთის კოვბოების“ იმიჯი.

მიზნობრივი მომხმარებლების შესწავლის მნიშვნელობის მაგალითად შეიძლება მოვიყვანოთ Nokia, რომლის მარკეტოლოგებმაც აღმოაჩინეს, სულ შემთხვევით, ახალი სამომხმარებლო სეგმენტი.

როდესაც Nokia-მ 1982 წელს გამოუშვა ტელეფონების ახალი მოდელი - ყველასათვის კარგად ცნობილი SMS- ბის პროტოკოლი მოცემული იყო, როგორც მეორეხარისხოვანი სერვისი (დანართის სახით).

SMS-ბით სარგებლობის სერვისს მაშინ არავინ თვლიდა სერიოზულ სერვისად.

მიზეზი კი იყო ძალზე მარტივი!

ტელეფონების მომხმარებელთა მიზნობრივ ჯგუფად Nokia-ს მიაჩნდა ბიზნესმენები, რომლებმაც „ფოკუს-ჯგუფების“ გამოკითხვებში განაცხადეს, რომ SMS-ის სერვისი მათ არ აინტერესებთ.

SMS-ის ტექნოლოგია იყო მაშინ მარტივი. SMS-ბის გზავნილების „სიგრძე“ შეზღუდული იყო 160 სიმბოლოთი და ამ შემთხვევაში, ლოგიკურად,  საღად მოაზროვნე ადამიანი SMS-ის გაგზავნის ნაცვლად, უპირატესობას მიანიჭებდა ტელეფონით უბრალოდ დარეკვას.

მაგრამ რეალობა იყო სულ სხვანაირი!

Nokia-ს ოპერატორების დაკვირვების შედეგად დადგინდა, რომ გაგზავნილი SMS-ის რაოდენობა კატასტროფიულად იზრდებოდა - მთელი ევროპის მასშტაბით!

(* ინფორმაციისათვის: დღეისათვის, მობილური ოპერატორების შემოსავლების 20% - მოაქვს SMS-გზავნილებს).

რა მიზეზით?

SMS-გზავნილების სერვისი თურმე მოირგეს თინეიჯერებმა და არ გაინტერესებთ, რატომ?

აქ იყო რამდენიმე წინაპირობა:

1) SMS-სერვისთან დაკავშირებით - სარეკლამო კომპანიის და აჟიოტაჟის არარსებობა!

თინეიჯერებმა თავისთვის აღმოაჩინეს SMS-ის შესაძლებლობები.

იმდენად, რამდენადაც ამ მიმართულებით რეკლამა ფაქტობრივად არ არსებობდა, მათ ჩათვალეს ეს, როგორც საკუთარი აღმოჩენა (მათი საკუთრება) და დიდი სიამოვნებით სარგებლობდნენ SMS-ს გზავნილებით, როგორც „საიდუმლო კავშირის“ დამყარების შესაძლებლობით. უფროსები ვერც კი ხვდებოდნენ - „საერთოდ რა ხდება...“

2) შემოქმედების სტიმული.

SMS-ის პროტოკოლით გათვალისწინებული 160-ნიშნულით შეზღუდვა მიღებული იყო, როგორც გამოწვევა და ლაკონიურობისა და კრეატიულობისაკენ მიმართული სტიმული.

თინეიჯერების ჯგუფებმა შეიმუშავეს საკუთარი და განსხვავებული გზავნილების „ენა“ და ლექსიკონი, რომელიც განანსხვავებდა თინეიჯერთა ერთ ჯგუფს - მეორესაგან. შედეგად წარმოიქმნა თინეიჯერების ახალი „კოდური ენა“.

3) SMS, როგორც „სარაფანის რადიო“.

SMS-ის მეშვეობით თინეიჯერები ადვილად იგებდნენ ახალ ინფორმაციას და სხვადასხვა სახის ჭორებს.

SMS-ის მეშვეობით თინეიჯერებს მიეცათ რაიმე ინფორმაციის ფართოდ გავრცელების შესაძლებლობა, ერთდროულად მრავალი აბონენტის მისამართით.

4) შეტყობინებების კონფიდენციალურობის დაცვის მშვენიერი საშუალება.

და ეს გასაგებიც არის, იმიტომ, რომ სატელეფონო საუბრებს შეიძლება მოუსმინოს ბევრმა არასასურველმა ადამიანმა, მათ შორის, მშობლებმაც. ამ შემთხვევაში SMS არის „ფარული კომუნიკაციის“ საშუალება.

v  სარეკლამო ტექსტების საიდუმლო!

„რადიკალური მარკეტინგის“ პროფესიონალები ამბობენ, რომ  - „მარკეტინგში, გაყიდვებსა და რეკლამაში არსებული პრობლემების მოსაგვარებლად არსებობს მხოლოდ  ერთი გზა - შეეკითხეთ თქვენს მომხმარებელს რა სურს სინამდვილეში, რადგან ეს არის ჭეშმარიტება ბოლო ინსტანციაში!“

რა ხდება დღეს რეკლამაში?

კომპანიები ცდილობენ მოკლე შეტყობინებით და შეზღუდულ ფორმატში დაარწმუნონ მომხმარებელი პროდუქტის (მომსახურების) შეძენის მიზანშეწონილობაში.

ამისათვის მიმართავენ მაღალფარდოვან (და ამავე დროს „შაბლონურ“), „აღმატებულ“ და „ტკივილამდე აუტანელ“  ფრაზებს („უპრეცენდენტო შეთავაზება!“ ... და ა.შ.) და შეთავაზების მოძველებულ „კლიშეებს“.

იხარჯება საკმაოდ დიდი თანხები სატელევიზიო, რადიო და გარე-რეკლამებში, იბეჭდება უამრავი სარეკლამო მასალები - და ყველაფერი ეს „წყალში გადაყრილი“ თანხებია!

ჩვენი რეკლამისტები ვერ ხვდებიან იმას, რომ მომხმარებელზე „მიხტომით“ და მაღალფარდოვანი შეძახილებით მის „გულს ვერ მოიგებ“.

 მით უმეტეს, როდესაც ყველა რეკლამა აგებულია ერთსა და იმავე ფატოსზე?. მომხმარებელს რჩება განცდა, რომ კომპანიები ცდილობენ „მიყიდონ“ (და შეატენონ) პროდუქტი, იმის ნაცვლად, რომ იზრუნონ სამომხმარებლო პრობლემატიკის გადაწყვეტაზე.

უცხოეთში ამას უკვე დიდი ხანია მიხვდნენ და მონახეს საკმაოდ მარტივი გამოსავალი.

სარეკლამო პრაქტიკამ ცხადყო, რომ რეკლამის ერთ-ერთი ყველაზე ეფექტიანი ფორმაა - შედარებით ფართო სარეკლამო სტატიების გამოქვეყნება, როგორც ბეჭვდით მედიაში, ისე ინტერნეტ-სივრცეში (Facebook, Twitter, Blog …).

როგორი უნდა იყოს სარეკლამო სტატიები, რომლებიც მიანიშნებენ პროდუქტის (მომსახურების) უნიკალურობაზე, უპირატესობებსა და მომხმარებელთა სარგებელზე?

ადამიანებს უყვართ სხვადასხვა საინტერესო ისტორიის მოსმენა და, აქედან გამომდინარე, სარეკლამო სტატია უნდა იყოს დამყოლი, დასამახსოვრებელი და საინტერესო!

ამის მიღწევა რა საკვირველია ძნელია და ამიტომაც უცხოეთში ძალიან ფასობს ე.წ. „კოპირაიტინგის“ (სარეკლამო ტექსტების მომზადება) სპეციალობა.

ჩვენთან ამ პროფესიის შესახებ ბევრმა არც კი იცის. ამიტომაც იგივე ინტერნეტ ვებ-გვერდების  ე.წ. „კონტენტი“ (ტექსტური ნაწილი) აბსოლუტურად არ არის საინტერესო წასაკითხი.

 კოპირაიტერის (სარეკლამო ტექსტების სპეციალისტი) მთავარი ამოცანა არის ის, რომ სარეკლამო ტექსტების მეშვეობით ქმედითი ზემოქმედება განახორციელოს მომხმარებელთა ემოციებზე, გრძნობებზე, მის განსაკუთრებულ „ეგო“-ზე და ა.შ.

მხოლოდ ამ შემთხვევაში შეიძლება მოვიპოვოთ მომხმარებლის „ლოიალურობა“ და მივაღწიოთ პროდუქტის გაყიდვების სასურველ დონეს!

როგორ შევადგინოთ ისეთი სარეკლამო ტექსტი, რომ მოვიზიდოთ მომხმარებელი?

როგორც აღვნიშნეთ, პირველ რიგში, ჩვენ კარგად უნდა ვიცნობდეთ ჩვენს მომხმარებელს (ანუ მიზნობრივი სამომხმარებლო ჯგუფების თავისებურებებს).

რაც შეეხება სარეკლამო ტექსტის სახეს - ის წარმოდგენილი უნდა იყოს როგორც „სლალომი“, ანუ მკითხველი არ უნდა გაჩერდეს და ბოლომდე  წაიკითხოს სარეკლამო სტატია. ამისათვის კი არსებობს სარეკლამო ტექსტების შედგენის მარტივი მეთოდი.

სარეკლამო ტექსტის სქემატური მოდელი:

1)      სათაური - ყურადღების მიქცევა;

2)      ქვესათაური - ყურადღების გაღვივება;

3)      მოკლე ისტორია - Storytelling;

4)      ძირითადი ტექსტი - პროდუქტის სარგებლიანობის

 და უპირატესობების აღწერა;

5)      პროდუქტის შეძენის დასაბუთება;

6)      ქმედება - რა უნდა გააკეთოს მომხმარებელმა.

კი გეთანხმებით - რთული საქმეა პროფესიონალური „კოპირაიტინგი“ და ალბათ ამიტომაც უმეტეს წილად რეკლამისტებმა და მარკეტოლოგებმა გამონახეს უფრო იოლი გზა - „მყვირალა“, გამაღიზიანებელი, შაბლონური და უმისამართო სარეკლამო განცხადებებით (სხვადასხვა მედია-საშუალებებით)  მომხმარებელზე თავდასხმა.

ზოგი  მიმართავს მეორე უკიდურესობას -  ცდილობს ერთ სარეკლამო განცხადებაში მოათავსოს რაც შეიძლება მეტი ინფორმაცია („რაც მეტია - უკეთესია...“)

ცხადია, რომ ამ ტიპის განცხადებებს საერთოდ არც არავინ  კითხულობს და არც ყურადღებას მიაქცევს!

ამასთან ერთად, კომპანიების უმეტესი ხელმძღვანელი უკვეთავს რეკლამას (სიუჟეტი, სცენარი და ტექსტი)  ისე, როგორც მას მიაჩნია სწორად, სინამდვილეში კი ამას მოაქვს უკუ-ეფექტი, მხოლოდ იმიტომ, რომ უგულებელყოფილია პროფესიონალი კოპირაიტერის აზრი და არ არის გათვალისწინებული მომხმარებელთა რეალური მოთხოვნილებები.

რა ვქნათ, ნათქვამია, რომ „ბრმების ქვეყანაში, ცალთვალაც მეფეაო“. ამიტომ ამ უაზრო რეკლამების ფონზე, ზოგიერთ რეკლამას მაინც „არა უშავს რა“.

 მაგრამ დავუბრუნდეთ ძირითად თემას, თუ როგორ და რა წესების დაცვით უნდა შევადგინოთ ეფექტიანი სარეკლამო ტექსტი.

 პირველი, რაც უნდა გავაკეთოთ - ეს უნდა ვკითხოთ საკუთარ თავს, თუ ვინ წაიკითხავს ამ რეკლამას და რა აწუხებს ( სურს) ამ ადამიანებს? რას და როგორ სთავაზობენ ანალოგიურ პროდუქტებს თქვენი კონკურენტები?

უნდა გვახსოვდეს, რომ ადამიანები ყიდულობენ არა იმას, რაც მათთვის არის საჭირო, არამედ,  ისინი ყიდულობენ იმას, რაც მათ სურთ!

იმისათვის კი, რომ „გავაღვიძოთ“ მომხმარებლებში  სურვილი, საჭიროა გარკვეულწილად „დავამსხვრიოთ“ არსებული სარეკლამო სტერეოტიპები.

იმ შემთხვევაში, თუ თქვენ გააგძელებთ იმის კეთებას, რასაც აკეთებდით აქამდე (და რასაც აკეთებენ სხვები) - თქვენ ვერ მიიღებთ ვერაფერს იმაზე უფრო ახალს, რაც უკვე გაქვთ.

თქვენ შეიძლება გქონდეთ ძალიან კარგი პროდუქტი, იდეა ან თანამედროვე ტექნოლოგია, მაგრამ თუ თქვენ ვერ ეტყვით ამის შესახებ მომხმარებელს ისე, რომ მან მოინდომოს მისი შეძენა - ჩათვალეთ, რომ არაფერი გიკავიათ ხელში.

შემდეგი მარტივი წესი!

აუცილებლად უნდა იყოთ მომხმარებლის წინაშე გულწრფელები და არ უნდა მოიტყუოთ. სამწუხაროდ, ბევრი ჩვენი კომპანია და, განსაკუთრებით კი ბანკები და საფინანსო კომპანიები, სცოდავენ ამ საკითხებში, რაც ჩემი აზრით წამგებიანი სტრატეგიაა  არა მხოლოდ გრძელვადიან, არამედ მოკლევადიან პერიოდშიც.

მაგალითისათვის მინდა მოვიყვანო ერთი საოჯახო რესტორნის სარეკლამო ტექსტი, რომელმაც არ მიბაძა ქართული რესტორნების „შაბლონურ რეკლამას“, არამედ მარტივად და გულახდილად მიმართა თავის პოტენციურ კლიენტურას ასე:

„თუ თქვენ გსურთ სმოკინგებში გამოწყობილი ოფიციანტების ხილვა , მაღალ ხმაზე სიმღერების მოსმენა და ბევრი მოქეიფე ხალხის გარემოცვაში ყოფნა - მაშინ ჩვენი რესტორანი თქვენთვის არაა!

მაგრამ, თუ თქვენ გხიბლავთ მყუდრო და რომანტიკული გარემო, რომელსაც ქმნის ჩვენი იტალიურ სტილში მოწყობილი ინტერიერი, სადაც თქვენ იგრძნობთ თავს „რომეო და ჯულიეტას“ ქალაქ ვერონაში! თუ თქვენ ხართ ოჯახური სამზარეულოს მოყვარული - ჩვენ შემოგთავაზებთ ორი სახის სახელგანთქმულ ქვევრის ღვინოს „მიხოს მარნიდან“ და საჩუქრად მოგართმევთ ჩვენს საიდუმლო საფირმო კერძს!

მობრძანდით თქვენს ახლობელ ადამიანებთან ერთად _________________ მისამართზე

ჩვენ გელოდებით!“

ეს არის მარტივი მომაჯადოებელი სარეკლამო ტექსტის მაგალითი და დარწმუნებული ვარ, რომ ამ მინი-წიგნის წაკითხვის შემდეგ თქვენ შეძლებთ ბევრად უფრო უკეთესი ტექსტების მომზადებას!

რამდენიმე პრაქტიკული რჩევა!

v  სარეკლამო გზავნილის (სტატიის, განცხადების) სათაური:

§  სათაურის მიზანია - ყურადღების მიქცევა;

§  სათაური უნდა იყოს მოკლე, შთამბეჭდავი და დამაინტრიგებელი;

v  ქვესათაურის დანიშნულება - სარეკლამო თემის მოკლე აღწერა (საერთოდ რაზეა საუბარი) და მკითხველის ინტერესის გაღვივება;

v  მოკლედ აღწერეთ მომხმარებლის პრობლემები - ის პრობლემები, რომლებსაც გადაწყვეტს თქვენი პროდუქტის (ან მომსახურების) შეძენა;

v  გაამწვავეთ პრობლემა - აჩვენეთ, თუ რა მდგომარეობაში იმყოფება (ან შეიძლება იმყოფებოდეს) მომხმარებელი თქვენი პროდუქტის ან მომსახურების გარეშე;

v  მოკლედ აღწერეთ, თუ როგორ გადაუწყვეტს მომხმარებელს პრობლემას თქვენი პროდუქტი;

v  იყავით გულახდილები - იმიტომ, რომ მკითხველი ამას გრძნობს;

v  აჩვენეთ სარგებელი და მისაღები ეფექტი;

§  იყიდება:

Ø  არა კოსმეტიკა - არამედ იმედები და ყურადღება!

Ø  არა „Porsche”- ს350 ცხენის ძალა - არამედ 100 კმ/საათში - 3 წამში!

Ø  არა “Rolex” - როგორც მაღალი ხარისხის საათი - არამედ პრესტიჟი და ინდივიდუალურობა!

v  სარეკლამო ტექსტი უნდა წააგავდეს მომხმარებელთან საუბარს;

v  მოკლედ დაასაბუთეთ პროდუქტის (მომსახურების) შეძენის მიზანშეწონილობა. აჩვენეთ, რომ პროდუქტის ფასეულობა უფრო მეტია, ვიდრე მისი ფასი;

v  ეცადეთ კონცენტრირება გააკეთოთ, არა იმდენად პროდუქციის მახასიათებლებზე, არამედ პროდუქტის გამოყენების (მოხმარების) ეფექტიანობაზე;

v  „რთული“ პროდუქტი აღწერეთ  მარტივად, ხოლო  „მარტივი“ პროდუქტი უფრო დეტალურად;

v  მოიყვანეთ პროდუქტის გამოყენების მაგალითები;

v  ეცადეთ გამოიცნოთ, თუ რა ტიპის შეკითხვები შეიძლება დაებადოს მომხმარებელს. დასვით ეს შეკითხვა ტექსტში და იქვე უპასუხეთ;

v  ეცადეთ არ გამოიყენოთ სიტყვები: ხარისხიანი, უნიკალური, კრეატიული, ინოვაციური, უპრეცენდენტო და სხვა „შაბლონური“ სიტყვები - მათი ნაკლებად ინფორმატიულობის მიზეზით;

v  სარეკლამო ტექსტის ბოლოში აუცილებლად მიუთითეთ, თუ რა უნდა მოიმოქმედოს მომხმარებელმა.

ეფექტიანი სარეკლამო ტექსტების შექმნის ტექნიკის სრულად აღწერა აღემატება ამ მინი-წიგნის ფორმატს და ვისაც სურვილი აქვს  დაეუფლოს ამ კრეატიულ ხელოვნებას, ვურჩევ სპეციალიზებულ ტრენინგზე დასწრებას.

ტრენინგის თემატიკა - „სარეკლამო ტექსტების შედგენის ხელოვნება“

(დეტალური ინფორმაციისათვის დარეკეთ - 593667218 ან მისწერეთ ელფოსტაზე:

text-master@hotmail.com).

აითვისეთ ეს საინტერესო და საჭირო პროფესიონალური უნარ-ჩვევები და წარმატებით გამოიყენეთ საკუთარი ბიზნესის განვითარებისათვის, ან საკუთარი ცხოვრებისეული მიზნების მისაღწევად!

თქვენ ნამდვილად შეძლებთ, რომ გახდეთ სარეკლამო ტექსტების „გურუ“!